「唉，我個仔話我藍到發黑喎！」
五十多歲的大學技工榮哥和同事強哥，如常在大學飯堂裏用膳，但實際上卻不太「如常」，畢竟他們已好幾天不在學校。
奈何今天的愁緒特別多。
「梗係啦，你條領咁藍！佢唔同你割蓆，已經好俾面㗎喇！」強哥把握機會，揶揄一下老朋友。
榮哥苦笑：「我捱咗幾十年藍領，終於供到個仔大學畢業，仲做埋主管級。你話佢咩態度吖？」
強哥見好友將發表偉論，合作地收聲，吃了兩口叉雞飯。
榮哥越説越大聲：「嗰晚我老婆正日生日，個仔話佢要去示威，爭取咩公義、咩正義。我同佢講：你把口咁正義，你啲孝義呢？你阿媽生日，叫你留喺屋企食飯都唔得，你呢啲唔識孝義嘅人，點講正義呀？吵完大鑊，個衰仔走咗，我跟住同老婆道歉，話我冇心將佢生日搞到咁，但係見到個仔咁，我就唔好老脾……」
強哥吃完碟飯，緩緩勸道：「你又唔好咁，有時候你都要體諒下啲後生仔，佢哋都好艱難嘅！」
「我知呀！」榮哥又嘆了一口氣：「我知佢哋為正義係好，但係嗰個是我個仔嚟㗎，我點樣唔擔心呢？佢有咩事，我點算呀？仲有呀，做乜一定要又黃又藍啫？法國對巴西呀！我想佢喺屋企食飯，同阿媽慶祝生日，咁又藍到發黑呀？黑？我老婆塊面就黑！」
強哥說：「都唔止嘅。」
榮哥好奇地問道：「仲有咩黑呀？」
強哥拿着碗碟慢慢站起來：「我諗：一陣間你老頂塊面仲黑！」
榮哥驚覺自己的焗豬扒飯，差不多還未開動過，於是胡亂吃了幾口，便趕急返回崗位工作。
不知道當你看到這裏，你會覺得誰是誰非呢？是榮哥不願意了解孩子，還是孩子不明白父母？是強哥不應置身事外，還是覺得他應該要體諒年輕人？
這些日子，多少家庭、情侶、朋友，因為政見不同而鬧得水火不容。因為先入為主的政見，我們渴望支持、討厭異端，在五花八門的訊息和意見中，我們自然而然地選擇了相信符合自己立場的資訊，拒絕接收相反角度的看法和聲音。耳濡目染，顏色越染越深。
我也有政見，但我不禁反思，到底關係的最深層是顏色還是愛？愛可否令人包容愛人的知見？而我們可否像佛陀般教導，運用知見而不執着知見？對我愛的人，我給自己的修行題目是包容：
我不認同你的理念，但我一樣愛你。
我不理解你的行為，但我會嘗試聆聽你的聲音。
我不喜歡你的方法，但我不會強迫你和我做一樣的選擇。
我只願你一切安好，因為你的平安比我更重要。